जाजरकोट । जाजरकोट भेरी नगरपालिका १३ स्थित कुदु बजार क्षेत्रमा CCTV निगरानी प्रणाली सञ्चालनमा आएको छ । स्थानीय स्तरमा सुरक्षा व्यवस्थालाई थप प्रभावकारी बनाउने उद्देश्यले जडान गरिएका ८ थान CCTV क्यामेरा बुधबार औपचारिक रूपमा प्रहरी चौकी कुदुलाई हस्तान्तरण गरिएको हो ।
भेरी नगरपालिका–१३ वडा कार्यालयको सहयोग तथा प्रहरी चौकी कुदुको समन्वयमा जडान गरिएका CCTV क्यामेराको शुभारम्भ तथा हस्तान्तरण कार्यक्रम आज बिहान सम्पन्न भएको हो ।
कार्यक्रममा जिल्ला प्रहरी कार्यालय जाजरकोटका प्रमुख प्रहरी नायव उपरिक्षक (डिएसपी) बुद्धिसागर पुरीको प्रमुख आतिथ्यता तथा भेरी नगरपालिका–१३ का वडा अध्यक्ष यज्ञ बटाला को अध्यक्षतामा कार्यक्रम सम्पन्न भएको थियो । कार्यक्रममा स्थानीय, बुद्धिजीवी, पत्रकार, समाजसेवी तथा सर्वसाधारण नागरिकहरूको सहभागिता रहेको थियो ।
“सुरक्षित नागरिक, सुरक्षित समाज” भन्ने मूल नारासहित आयोजित कार्यक्रममा नव जडित CCTV क्यामेराको औपचारिक शुभारम्भ गर्दै प्रहरी चौकी कुदुलाई जिम्मेवारी हस्तान्तरण गरिएको थियो ।
कार्यक्रममा बोल्दै प्रमुख अतिथि पुरीले आधुनिक प्रविधिको प्रयोगले अपराध नियन्त्रण, अनुसन्धान तथा शान्ति सुरक्षालाई थप प्रभावकारी बनाउन महत्वपूर्ण भूमिका खेल्ने बताउनुभयो । उहाँले CCTV निगरानी प्रणालीले बजार क्षेत्रको गतिविधिमाथि प्रभावकारी निगरानी राख्न मद्दत पुग्ने विश्वास व्यक्त गर्नुभयो ।
वडा अध्यक्ष बटालाले स्थानीय नागरिकको सुरक्षालाई प्राथमिकतामा राखेर CCTV जडान गरिएको बताउँदै आगामी दिनमा पनि सुरक्षा तथा विकासका कार्यक्रमलाई निरन्तरता दिइने जानकारी दिनुभयो ।
CCTV प्रणाली सञ्चालनमा आएसँगै कुदु बजार क्षेत्रमा हुने विभिन्न गतिविधिको निगरानी सहज हुने, सम्भावित आपराधिक घटनाको रोकथाम तथा अनुसन्धानमा सहयोग पुग्ने अपेक्षा गरिएको छ । स्थानीयवासीले पनि उक्त पहललाई सुरक्षा व्यवस्थापनका लागि सकारात्मक कदमका रूपमा स्वागत गरेका छन् ।
द मालिका पोष्ट । २०८३ जेष्ठ २१ गते बिहिवार